Околу 100 000 граѓани на Република Северна Македонија живеат и работат во Швајцарија, а околу 30 000 имаат добиено швајцарско државјанство, посочил заменик-директорот за иселеништво и миграција на Швајцарија, Михаел Хекендорн, на средбата со министерот за диајспора Едмонд Адеми денеска во Берн.
„Хекендорн го запозна министерот Адеми со начинот на кој Швајцарија го реализира целиот процес на интеграција и притоа даде комплименти за македонската дијаспора, која е целосно интегрирана во швајцарскиот систем“, соопшти Кабинетот на Адеми за неговата средба со Хекендорн, на која присуствувале и Кристијан Винтер, министер, регионален координатор за Југоисточна Европа, и Андреас Гериц, заменик-директор
за Западен Балкан во Швајцарската агенција за развој и соработка.
Министерот Адеми истакнал дека во март оваа година нашата Влада ја усвои првата Национална стратегија за соработка со дијаспората со што е поставена цврста основа за нови стандарди во соработката помеѓу Република Северна Македонија и нејзината дијаспора.
„Дополнително, министерот Адеми презентираше дел од активностите кои веќе се преземени, а кои произлегуваат од Националната стратегија за соработка со дијаспората. Како резултат на оваа средба, претставниците на швајцарската страна посочија дека е планирана посета на Република Северна Македонија во втората половина на ноември, при што се очекува нова средба со министерот Адеми и можност за идентификување поле за поинтензивна соработка на конкретни проекти и активности“, информира Кабинетот на министерот за дијаспора Едмонд Адеми.
