На азиските берзи на почетокот на неделата владее позитивно расположение, додека инвеститорите ги очекуваат овонеделните одлуки на Американската федерална банка (ФЕД) и Европската централна банка (ЕЦБ) за уште едно зголемување на каматните стапки, но и индиции дека циклусот на заострување на нивните монетарни политики се ближи кон крајот.
Денеска околу 7.30 часот, МСЦИ, индексот на азиско-пацифичките акции без јапонските, беше во плус 0,83 отсто.
Истовремено, индексот Никеи зајакна за 1,33 отсто, јужнокорејскиот Коспи за 0,73 отсто, а австралискиот АСХ 200 за благи 0,03 отсто.
Очекувањата и за ФЕД и за ЕЦБ се дека тие оваа недела ќе ги зголемат каматните стапки за нови 0,25 процентни поени, така што фокусот на инвеститорите е на прес конференциите на претседателот на ФЕД, Џером Пауел, и на претседателката на ЕЦБ, Кристин Лагард, после заседавањето на централните банки.
Аналитичарите истакнуваат дека и за едните и за другите се очекува дека ќе укажат на тоа оти ова е последното зголемување на каматните стапки во овој циклус, но веројатно ниту Лагард, ниту Пауел, нема толку конкретно да го кажат ова, туку ќе сигнализираат дека сè зависи од понатамошните показатели. Според аналитичарите, показателите за економската активност и за инфлацијата во двете регии се доволно ослабени за да се оправда крајот на циклусот на заострување на монетарната политика.
Засега единствена непозната е Банката на Јапонија, која заседава во петок, и најверојатно ќе продолжи со својата ултра лабава монетарна политика, додека некои западни банки шпекулираат дека се можни одредени корекции.
(Фото: Блумберг)
