Францускиот претседател, Емануел Макрон, размислува да ги блокира интернет медиумите во борбата против понатамошните немири во Франција.
„Неопходно е да се размислува за тоа како младите луѓе, кои протестираат, ги користат социјалните мрежи и за можни забрани“, рече Макрон вчера на состанокот со градоначалниците во Париз.
„А, ако работите излезат од контрола, можеби ќе мора да се ставите во позиција да ги регулирате социјалните мрежи или да ги затворите. Само, дефинитивно, тоа не треба да се направи туку така, без да се согледа целата ситуација, и позитивното ама и негативното. Искрено, мило ми е што не требаше да го направиме тоа“, рече Макрон.
Претседателот во петокот ги обвини социјалните мрежи за ескалацијата на насилството за време на протестите против полициската бруталност.
Насилните собири, рече тој, се организираа преку социјалните мрежи. Макрон истакна дека за управувањето со социјалните медиуми мора да се размислува трезвено.
„Затоа што кога ќе стане инструмент за собирање или за обиди за убиства, тоа е вистински проблем.“
Во меѓувреме, во северна Франција, засилени се контролите на границите со Белгија за да се запре увозот на пиротехнички средства, објави весникот „Ле Парисиен“ вчеравечер, цитирајќи неименувани извори од полицијата.
Полицијата во северна Франција нареди да се забрани продажбата и носењето пиротехнички средства и бензин во канистри до средината на јули.
Од смртта на 17-годишниот Нахел, кој беше убиен од полицаец за време на сообраќајна контрола во вторникот минатата недела, Франција ја потресуваат сериозни немири: грабежи, палење и насилни судири меѓу полицијата и демонстрантите.
Против полицаецот кој пукаше во момчето се води истрага поради сомнение за убиство од небрежност.
(Фото: АФП)
