Британската нафтена компанија „Шел“ денеска објави дека повторно ќе ја зголеми дивидендата за 15 отсто и ќе го зајакне производството на природен гас, откако раководството сигнализираше обновен фокус на фосилните горива, кои минатата година му донесоа рекорден профит за секторот.
„Шел“ одлучи постепено да го подига нивото на дивиденда, откако претходното раководство направи големо намалување со избувнувањето на пандемијата.
Со најновото, последно, зголемување, кое ќе стапи на сила од второто тромесечје, дивидендата на „Шел“ сеуште е околу 30 отсто под нивото пред пандемијата.
Покрај зголемувањето на дивидендата, компанијата продолжи да спроведува сопствена програма за откуп на акции во кварталот од најмалку 5 милијарди долари, додека годишните капитални вложувања се очекува да бидат во опсег од 22 до 25 милијарди долари во периодот меѓу 2024 и 2025 година, во споредба со 23-27 милијарди долари оваа година.
„Шел“, сепак, и после зголемувањето, заостанува зад своите американски колеги кога станува збор за политиката на дивиденда.
Нафтената компанија ќе се обиде да го развие својот интегриран бизнис со гас и да го стабилизира производството на нафта до 2030 година, откако тоа падна за околу 20 отсто во однос на врвот што беше постигнат во 2019 година. Компанијата повеќе нема да има за цел да го намалува производството на нафта за 1-2 отсто годишно, откако го оствари почетниот план за намалување на производството побрзо од очекуваното, се со цел да се намалат емисиите на јаглерод диоксид.
Од компанијата велат дека планираат да инвестираат 10-15 милијарди долари од 2023 до 2025 година во извори на енергија со низок степен на јаглерод, како што се биогорива, водород, полнење електрични возила и геолошко складирање на јаглерод диоксид.
Овие капитални вложувања, истакнуваат од „Шел“, ќе треба да се придржуваат до заложбите на компанијата да им испорача повеќе пари на акционерите. Акциите на „Шел“ на берзата во Амстердам забележаа раст од 1,2 отсто, сега чинат по 27,5 евра, и се со вредност приближно онолку колку што беа пред почетокот на пандемијата.
