Конечно е завршена сагата околу трансферот на Чилеанецот Алексис Санчез од Арсенал во редовите на Манчестер јунајтед и тоа за 30 милиони фунти. Проблем во целата приказна претставуваше заминувањето на Хенрик Мекхитаријан во другиот правец, но и тука е постигнат договор.
Санчез сп „црвените ѓаволи“ потпиша четиригодишен договор кој му гарантира неделна плата од 300 илјади фунти. Таквите примања, наводно, биле главна причина зошто од трката по него се повлекол Манчестер сити кој до неодамна беше главен кандидат.
„Воодушевен сум што стигнав во најголемиот клуб на светот. Минав три ипол прекрасни години во Арсенал и со себе носам преубави спомени од тој голем клуб. Меѓутоа, приликата да заиграм на историскиот Олд Трафорд и да соработувам со Мурињо не можев да ја одбијам, изјави Санчез.
Од друга страна, Ерменецот Мекхитаријан на Емирати неделно во џеб треба да „става“ околу 180 илјади фунти.
„Среќен сум дека конечно се се заврши и што стигнав во овој клуб. Ова е остварување на сите мои соништа затоа што од секогаш сонував дека еен ден ќе заиграм за Арсенал. Сега кога стигнав ќе дадам се од себе за да се запишам во историјата на овој клуб“, потенцираше Мекхитаријан.
Санчез кој во Јунајтед ќе го носи дресот со број „7“ дојде во Арсенал во 2014 година од Барселона за 34 милиони евра и во редовите на лондонскиот клуб за 165 настапи постигна 80 голови.
Мекхитаријан на Олд Трафорд се пресели во 2016 година од Борусија од Дортмунд за 30 милиони евра и на 60 натпревари даде 13 голови.
