Авиони на американското воено воздухопловство изведоа уште еден извидувачки лет над акваторијата на Средоземното море во близина на сирискиот брег, каде што се наоѓаат руски бродови, пишуваат руски медиуми повикувајќи се на сајтови кои го следат движењето на воената авијација.
Патролниот противбродски авион П-8А „Посејдон“ и стратешкиот извидувач РЦ-135В, кои полетале од авио-базата на Сицилија, односно Крит, изведоа извидувачки летови над подрачјето во близина на брегот на Сирија, кое е затворено за пловидба поради изведување на ракетни лансирања од руски бродови.
Бродовите „Адмирал Есен“, „Адмирал Глигорович“ и подморницата „Краснодар“ на Воената морнарица на Русија извршија шест лансирања на крстаречки ракети „Калибар“ на објекти на терористи припадници на организацијата ДАЕС во Сирија. Лансирањата беа изведени од источниот дел на акваторијата на Средоземното море. Подморницата „Краснодар“ лансирала крстаречки ракети од подводна положба. Во таа прилика уништени биле контролни пунктови на ДАЕС во провинцијата Хама.
