Повеќе од половина Американци не го одобрува начинот на кој претседателот на САД, Доналд Трамп, управува со односите со Русија, но на неговата популарност не влијаеше самитот во Хелсинки на кој тој одби да ја обвини Русија за мешање во американските избори во 2016 година.
Тоа го покажуваат резултатите од најновата анкета која ја спроведе Ројтерс со институтот Ипсос после самитот и заедничката конференција за новинари на Трамп и Путин, според кои 42 отсто од регистрираните гласачи ги одобрува потезите на Трамп на функцијата претседател.
Колку за споредба, до сега просечно дневно 40 до 44 отсто Американци имаа позитивно мислење и зборови на пофалба за Трамп.
Со најновата анкета е утврдено дека 55 отсто од американските испитаници меѓу регистрираните гласачи не го одобрува начинот на кој Трамп раководи со односите со Русија, додека 37 отсто од испитаниците тоа го одобруваат.
Меѓу републиканците 71 отсто велат дека немаат ништо против политиката на Трамп кон Русија, додека кај демократите такво мислење имаат само 14 отсто.
Трамп и натаму ужива широка поддрѓка меѓу републиканските гласачи, и покрај критиките кои му стигнуваат од партиските лидери поради неговиоте изјави и постапки додека заедно со рускиот претседател Путин одговараше на прашања на новинарите после самитот во Хелсинки во понеделникот, покажуваат резултатите од најновото истражување.
Трамп, меѓутоа, ги изненади и своите приврзаници кога на таа конференција за новинари го поздрави „силното и моќно“ непризнавање на Путин за мешање во американските избори.
Повеќето од регистрираните гласачи, 59 отсто, се согласуваат со заклучоците на американските разузнавачки агенции дека Русија се обидела да влијае на изборите во САД, на што веруваат само 32 отсто од републиканците, додека на тоа му веруваат дури 84 отсто од демократите.
Анкетата на Ројтерс и Ипсос ја открива и јасната поделба меѓу републиканските и демократските гласачи кога станува збор за прашањето дали Русија би требало да се смета за непријател на САД.
Вкупно 38 отсто од гласачите смета дека Русија е непријател на САД, додека отприлика ист процент на испитаници ја смета дека е „конкурент“, а осум отсто – „пријател“.
Како непосредна закана Русија ја гледаат 27 отсто регистрирани гласачи во САД.
