Новите тарифи на Соединетите Американски Држави за увоз на кинески стоки денеска стапија на сила, а од Пекинг порачуваат дека ќе бидат приморани на контраудар во спорот на двете економски велесили, за чија ескалација американскиот претседател Доналд Трамп, како што сам вели, е подготвен.
Вашингтон ги зголеми царините на 34 милијарди долари вредниот увоз од Кина во 12:01 часот по источно американско време, што е прв чекор кој би можел да доведе до верижна реакција и забрзување на серија на нови тарифи, известува агенцијата АП.
Кинеското министерство за трговија соопшти дека ќе биде присилено да превземе „нужен контранапад“, но не изнесе никакви поблиски детали. Пекинг, меѓутоа, претходно објави листа на американски стоки кои ќе бидат предмет на одмазда, а на која, меѓу останатите, ќе се најдат соја, електрични автомобили и виски.
Финансиските пазари веднаш реагираа на најновиот развој на случувањата. Индексот на јапонската берза Никеи 225 скокна за 1,4 отсто, додека композитниот индекс на берзата во Шангај зајакна за 0,7 отсто, а хонгкошкиот Ханг Сенг за 0,8 отсто.
Трамп во четвртокот разговараше за трговската војна со новинарите кои со него летеа во Монтана по повод изборната кампања.
Претседателот на САД во таа прилика најави дополнителни американски тарифи на увозот од Кина во вредност од 16 милијарди долари, кои ќе бидат воведени за две недели.
Американската агенција наведува дека после тоа непријателството би можело уште повеќе да се заостри, и дека Трамп рекол дека Америка е подготвена да цели на дополнителни 200 милијарди долари кинески увоз, а после тоа на уште 300 милијарди долари, ако Пекинг не попушти на барањата на Вашингтон и ако продолжи со мерки на одмазда.
Со тоа вкупниот износ на кинеските стоки кои се на удар на американските тарифи би достигнал потенцијални 550 милијарди долари – што го надминува минатогодишниот извоз на производи од Кина во САД од 506 милијарди долари.
Администрацијата на Трамп тврди дека Кина развила „предаторски тактики“ во настојувањето ги претекнат САД на планот на глобалната технолошка доминација. Оваа тактика, според тврдењата на Вашингтон, вклучуваат сајбер-кражби и условување на американски компании да ги отстапат своите технологии на Кинезите во замена за пристап на кинескиот пазар.
Провладиниот кинески весник „Чајна Дејли“ ја обвини американската администрација дека се однесува како „банда хулигани“, која би можела да нанесе штета на глобалната економија ако другите земји не ја запрат, додавајќи дека „не треба да постојат недоумици во поглед на одлучноста на Пекинг“.
Американската стопанска комора во Кина апелираше на двете страни да преговараат за решавање на состојбата.
„Нема победник во трговската војна“, наведе претседателот на таа комора Вилијам Зарит во соопштение, додавајќи дека американските компании сакаат праведен третман, додека тензиите меѓу САД и Кина ќе им наштетат.
„Ги повикуваме двете влади да се вратат на преговарачката маса“, порача Зарит.
