Агенцијата за храна и ветеринарство досега нема добиено пријава дека на македонскиот пазар се пласирани небезбедни минерални води и газирани пијалаци.
Од Агенцијата денеска преку соопштение информираат дека се зајакнати инспекциските контроли при увоз на храна од Хрватска.
„Како одговорна институција за безбедноста на храната, ја следиме состојбата со случаите на труење со газирани пијалаци и минерална вода во Република Хрватска. Зајакнати се инспекциските контроли при увоз на храна од оваа земја и доколку се јави потреба, навреме ќе бидат преземени потребните мерки за заштита на граѓаните и од овој тип небезбедни производи“, се наведува во соопштението.
Во Хрватска четири лица се хоспитализирани поради сомнение дека се затруени од газирани пијалоци – три во Загреб и едно во Риека. Полицијата врши увид и зема мостри од спорниот пијалок за понатамошна анализа и истрага.
„Првиот пациент од болницата во Загреб, откако имал поблаги симптоми после консумирање на газиран пијалок, е пуштен дома.
Утврдено е дека има мали ендоскопски повреди на непцето и на горниот дел на хранопроводникот. Вториот пациент нема повреда на хранопроводникот“, изјави Мирјана Калауз, гастроентеролог во загребската болница.
Таа додаде дека и двајцата забележале печење и болка во устата и болка и отежнато голтање, кои се симптоми на „дигестија од корозивни средства“.
Хрватските лекари апелираат до граѓаните доколку испијат затруена течност да не пијат вода, сода бикарбона и слично, туку да одат на лекар.
Хрватскиот завод за јавно здравје ги добил мострите од безалкохолни пијалоци кои санитарната инспекција ги доставила по истрага во кафуле во Риека, каде неодамна му се слошило на едно лице, а резултатите од анализата ќе бидат доставени до Државниот инспекторат.
Експертите тврдат дека е малку веројатно дека се затруени само одделни шишиња газирани пијалоци.
Хрватскиот министерот за здравство, Вили Берош, на новинарско прашање дали граѓаните можат да бидат сигурни, одговори дека тоа во моментов никој не може да го каже и додаде дека најдобро е да се пие обична вода.
(Извор: МИА)
