Шпанскиот фудбалски гигант Барселона ја блокираше исплатата на 26 милиони евра бонус за Нејмар, чекајќи го расплетот на приказната околу можниот трансфер на Бразилецот во ПСЖ, тврди неименуван извор од каталонскиот клуб, пренесува агенцијата АФП.
„Тие 26 милиони евра се депонирани кај нотар, додека не биде јасно дали останува кај нас“, изјавил соговорникот за АФП.
Станува збор за бонус кој Нејмар го договорил пред една година, кога Бразилецот го продолжи договорот со Барселона до 2021 година, иако и тогаш ПСЖ бил заинтересиран за негово доведување. Со тој договор отштетна клаузула е зголемена од 200 милиони на 222 милиони евра. Но, ниту тоа се чини дека не претставува препрека за челниците на ПСЖ, кој сака да го доведе Бразилецот во својата екипа.
После успешните подготвителни настапи на северноамериканскиот континент, каде што со добар дел благодарение на мајсториите на Нејмар, Барселона успеа да ги победи Јувентус, Манчестер јунајтед и Реал Мадрид, Бразилецот не се врати со соиграчите во Европа, туку отпатува во Кина, каде учествуваше во промотивни кампањи во текот на кои не сакаше да го коментира можното заминување во ПСЖ.
Каталонците утре претпладне ќе продолжат со подготовките за претстојната сезона, а тогаш Нејмар повторно би требало да му се приклучи на тимот. Меѓутоа, шпанските медиуми со седиште во Барселона во денешните изданија изразија сомнеж дека на тој тренинг Нејмар навистина ќе се појави.
