Претседателот на Соединетите Американски Држави, Џо Бајден, денеска апелираше до Американците да добијат зголемена доза од вакцината против Ковид 19 и да го поддржат неговиот план за сузбивање на „омикрон“, новиот вид на корона вирус, преку поголема достапност на вакцини, но без поголеми ограничувања во секојдневниот живот.
Бајден сака приватните осигурителни компании да ги покријат сите трошоци за домашните тестови за ковид и да ги заострат условите за тестирање на сите луѓе кои доаѓаат во САД, без разлика дали се вакцинирани, пренесува Гласот на Америка.
Додека некои земји ширум светот ги затвораат границите или повторно воведуваат карантини, Бајден рече дека во овој момент нема да има дополнителни мерки освен препораката Американците да носат маски во затворени простории и на јавни места.
„Експертите велат дека бројот на случаи на корона вирус ќе продолжи да расте во наредните недели оваа зима, поради што мора да бидеме подготвени“, рече американскиот претседател за време на посетата на Националниот институт за здравство во предградието на Вашингтон.
Тој истакна дека неговата нова стратегија не „вклучува затворање и карантин“ и се надева на билатерална поддршка.
„Објавувам одлучувачки план во борбата против Ковид-19 и мислам дека тој треба да не обедини“, додаде Бајден.
Спроведувањето на уредбата на Бајден за задолжителна вакцинација во поголемите компании е блокирана пред судовите во некои земји, поради што претседателот ги повика компаниите да наредат имунизација на своите работници, за да можат да останат отворени без ширење на инфекцијата.
Администрацијата на Бајден верува дека широко распространетата имунизација со засилувачи е најефективното средство за борба против Ковид оваа зима.
Здравствените експерти се уверени дека дополнителните дози на вакцината обезбедуваат засилена и потрајна заштита, вклучително и од нови варијанти.