Последните акции на Никола Груевски потсетуваат на времето на Слободан Милошевиќ. Тој ги штити интересите само на десетина лица. Македонија нема потреба од неговиот псевдопатриотизам, наведува во интервју за бугарската агенција БГНЕС Петар Богоески, член на ВМРО-ДПМНЕ, еден од оние кои се залагаат за реформи и демократизација на ВМРО-ДПМНЕ.
Според него, ако во најскоро време не се случат реформи во партијата, можне е да дојде до нејзино целосно уништување.
Иницијативата за реформи и демократизација на ВМРО-ДПМНЕ се залага за промена на статутот на партијата, членството да има одлучувачка улога при изборот на партиските органи и носењето решенија. Како што посочува Богоески, иницијативата е внатрепартиска и искрено вмро-вска и таа не е предизвикана од надворешни или странски партнери.
Договорот за добрососедство меѓу Македонија и Бугарија, вели тој, отвора големи перспективи.
Според Богоески, мора јасно да се разграничи разликата меѓу ВМРО, ВМРО-ДПМНЕ и Никола Груевски.
„Ако кариерата на еден политичар е загрозена, тоа не значи дека е загрозена иднината на државата. Не треба да бидеме заложници на неодговорни политики кои ни ги претставуваат личните интереси како национални“, напоменува Богоески.
Прашан за неговите очекувања за исходот на престојните локални избори во македонија Богоески вели:
„Без Никола Груевски би постигнале многу подобар резултат. За жал, инаетот на Груевски е поважен од нашиот партиски интерес и влеговме во кампања под негово раководство. Затоа, неизвесна е нашата победа во многу општини“.
А, пак, за „Новата ера’ што ја најавува Груевски, Богоески е дециден:
„,Новата ера’ на Никола Груевски се споредува со онаа на Милошевиќ. Во ниту еден случај не можеме да зборуваме за некаква ,нова ера’ на Груевски. Што значи тоа, дека сега ќе имаме некаков ,нов Груевски’? Тоа е неразбирливо, такво нешто не се сретнува дури и во политичката литература“.
За Богоески погрешен е ставот на меѓународната заедница за тоа дека сите во ВМРО-ДПМНЕ биле следбеници на Никола Груевски.
„Ние сме следбеници на вредностите на ВМРО-ДПМНЕ, а не на Никола Груевски. Тој е само еден партиски лидер во заминување“, нагласува Богоески.
