Уставниот суд доби двајца уставни судии. Правничката Татјана Васиќ-Бозаџиева и судијата Фатмир Скендер ќе заземат две од испразнетите четири места откако денеска беа изгласани со мнозинство гласови во Собранието. Тие веднаш ги дадоа и свечените изјави со што и официјално стапија на функција.
И за Васиќ-Бозаџиева и за Скендер „за“ гласаа 65 пратеници, а еден беше „против“. Пратениците на пратеничката група на ВМРО-ДПМНЕ, пак, ја напуштија пленарната сала пред гласањето бидејќи, како што рекоа, не сакаат да го легитимираат кршењето на процедурите при изборот на уставни судии.
„Жалам што помагате да се урниса правниот поредок и довербата во правниот поредок во државата. Жалам што не можевте да излезете од партиските стеги и на дел од Уставниот суд му залепивте етикета ’партизирана институција‘. Ваквиот Уставен суд, ваквите процедури нема да ги гласаме и нема да присуствуваме и тоа е причина поради која ќе го напуштиме денешното гласање и сите оние гласања на кои не сакаме да ви дадеме легитимитет. ВМРО-ДПМНЕ и коалицијата нема да присуствуваат на давање на легитимност на нешто што успеавте да го направивте на начин што е недостоен за работата на Собранието“, рече координаторот на пратеничката група на ВМРО-ДПМНЕ, Никола Мицевски, по што тој и неговите колеги излегоа од салата.
Опозицијата е на став дека процедурата по која се избраа овие двајца судии е незаконска бидејќи, наместо да се заврши расправата во Комисијата за прашања за изборите и именувањата за сите предложени имиња и на крај да се испрати предлог за тројца кандидати колку што се бараа со огласот, власта направила преседан и на незавршена расправа испратила предлог до собранискиот пленум за само двајца.
Васиќ-Бозаџиева и Скендер се избраа по распишан оглас за тројца уставни судии откако лани во мај им завршија мандатите на Сали Мурати, Елена Гошева и Никола Ивановски.
Комисијата за прашања за изборите и именувањата во мај годинава утврди предлози за девет кандидати. Васиќ-Бозаџиева, Скендер и актуелниот републички обвинител, Љубомир Јовески, ги предложи мнозинството, а опозициската ВМРО-ДПМНЕ, пак, ги предложи Тодор Витларов, обвинителот од Вишото јавно обвинителство во Штип, Воислав Димоски, поранешен обвинител, а сега адвокат, пензионираниот универзитетски професор Саво Климоски, Родна Живковска, професорка од Правниот факултет, Весна Јовановска, судијка од Битола и Бранко Секулоски, поранешен судија во судот во Гостивар.
