Врховниот суд на Бразил даде зелено светло за почеток на фудбалскиот куп на Америка, и покрај алармантните бројки од ковид-19 во таа земја.
Повеќето судии ги одбија жалбите на две левичарски партии и синдикати кои бараа откажување на турнирот, така што Купот на Америка ќе почне во недела со натпреварот меѓу Бразил и Венецуела во Бразилија.
Купот на Америка првобитно требаше да се одржи во Аргентина и Колумбија, но тие две земји се откажаа од тоа.
Колумбија како домаќин на турнирот отпадна на 20 мај заради бранот протести против претседателот Иван Дуке, а додека Аргентина се откажа заради состојбата со корона вирусот.
„Конмебол“ потоа, на изненадување на многумина, за домаќин го избра Бразил каде што здравствената состојба е посериозна од онаа во Аргентина.
Заради тоа три жалби беа поднесени до Врховниот суд, но судиите сметаа дека не е на нив да го откажат Купот на Америка, дека немаат таква надлежност.
Според мислењето на судијата Кармен Лусија, само државните власти можат да дозволат или забранат одржување на турнирот.
Таа наведе дека сега им останува на гувернерите на државите и на градоначалниците да спроведат протоколи за да се одбегне поголемо ширење на вирусот.
Градоначалникот на Рио де Жанеиро, Едуардо Паес, минатата недела најави дека нема да се срами да ги забрани натпреварите во тој град ако здравствената состојба се влоши.
Судијата Рикардо Левандовски ја повика владата на претседателот Жаиро Болсонар да претстави детален план на превентивни мерки пред почетокот на турнирот.
Иако и тој сметаше дека не е во надлежност на Врховниот суд да ги откаже натпреварувањата, го критикуваше фактот дека владата се согласила да ги организира во краток роккрај сериозноста на здравствената состојба.
Одлуката Купот на Америка да се игра во Бразил предизвика негодувања во земјата во која и понатаму се бележат околу 2.000 смртни случаи од корона вирус на дневно ниво.
Протестот против Купот на Америка закажан е за во недела во Бразил, неколку часови пред воведниот натпревар.
Во вторникот и играчите на бразилската репрезентација го изразиле своето незадоволство, но ја исклучиле можноста од бојкот.
„Ние сме против организацијата на Купот на Америка, но никогаш нема да и кажеме ‘не’ на репрезентацијата“, напишаа тие на социјалните мрежи.
(Фото: ЕПА/ЕФЕ)
