Бразил е познат по фудбалот и самбата, но се чини сè повеќе и по неонацистите и расно мотивираните злосторства.
Во февруари, 17-годишно момче со кукаст крст на раката е обвинето дека фрлил две рачно изработени експлозивни направи во училиште. Потоа, во март, 13-годишно момче, кое носело маска со насликан череп, каква што обично имаат американските неонацисти, избоде наставник до смрт, а минатиот месец 16-годишник е пукаше во училиште и притоа уби соученик и рани уште двајца. Тинејџерот претходно објави фотографија од кукаст крст нацртан на неговото лице, објавија бразилските власти, додавајќи дека оваа година спречиле стотици слични неонацистички напади.
Заради тоа, во април, новиот бразилски министер за правда, Флавио Дино, и нареди на федералната полиција да го истражи, она што тој го нарече, зголемувањето на „говорот на омраза и нетолеранцијата од неонацистичките, неофашистичките и екстремистичките групи“.
Многу истраги се концентрирани во јужен Бразил, каде што 73 отсто од населението се изјаснуваат како белци, во споредба со 43 отсто на национално ниво.
За ставовите на тамошните граѓани зборува податокот според кој во овој регион 62 отсто од гласачите на последните претседателски избори гласале за екстремно десничарот Жаир Болсонаро, наспроти 49 отсто на национално ниво.
Некои тоа го поврзуваат со историјата. Пред Втората светска војна, од 1928 до 1938 година, Бразил ја имаше најголемата нацистичка партија надвор од Германија, со 2.900 членови во 17 сојузни држави. После војната, Бразил, како и другите јужноамерикански нации, стана засолниште за нацистите кои бегаат од кривичен прогон, потсетува „Њујорк Тајмс“.
Во такви околности, оваа година бразилската сојузна полиција отвори 21 истрага која вклучува неонацисти, што е исто како и во трите претходни години заедно. Некои истражители го поврзуваат зголемувањето на неонацистичката активност во Бразил со четирите години на Жаир Болсонаро како претседател. Безмалку исто како што американските екстремистички групи се засилија за време на претседателскиот мандат на Доналд Трамп, бразилската крајна десница се „закачи“ на запаливата реторика на Болсонаро.
На пример, после државната посета на Израел во 2019 година, Болсонаро изјави дека нацистите се левичари и дека „можеме да простиме, но не и да заборавиме“ на холокаустот, што предизвика критики од израелскиот претседател.
Во 2020 година, тогашниот министер за култура на Болсонаро беше принуден да поднесе оставка после говорот кој беше толку сличен на оној на Џозеф Гебелс, главниот пропагандист на Нацистичката партија, дури се чинеше и дека некои делови се копирани.
А, на прес-конференција во 2021 година, еден од помошниците на поранешниот претседател со рака направи гестикулација „ОК“ пред камерите, што означува „бела моќ“ во белите супремацистички кругови. Дури беше обвинет и за злосторство од омраза, но случајот подоцна беше отфрлен.
Додека администрацијата на Болсонаро избегнуваше да ги истражува неонацистичките групи, ова прашање стана приоритет за левичарскиот претседател Луис Инасио Лула да Силва, кој минатата година го победи Болсонаро.Рации на неонацистички групи оваа година се случија во најмалку десет држави, а во јули бразилската полиција спроведе операција во четири држави против 15 лица поврзани со неонацистичката група под називот „Нови СС од Санта Катарина“ (New SS of Santa Catarina), која користела 3Д принтери за производство на пиштоли.
Во една рација, полицијата беше дочекана со истрели од огнено оружје додека влегувале во селска куќа во Нова Петрополис, живописен планински мал град во кој живеат 20.000 жители, од кои многумина се потомци на германски имигранти. Лицето кое пукало во полицајците била жена со мало дете и доенче. Никој не е повреден, а полицијата соопшти дека во нејзиниот дом пронашла два пиштола, 96 парчиња муниција и купишта нацистички материјали, вклучувајќи ленти со кукасти крстови за на рака, германски сувенири од Втората светска војна, знаме на меѓународна неонацистичка група и репроматеријали за производство на стоки за локална неонацистичка група. За судот тоа не биле доволни докази, па жената набрзо била пуштена на слобода.
(Фото: Скот Олсон/Гети имиџис-АФП)
