Европската Унија подготвува нов, голем список на санкции против Русија, во кој би можело да се вклучат околу 1.600 физички и правни лица, објави Политико, повикувајќи се на европски дипломатски извори.
Според медиумот, новиот список вклучува по околу 800 физички и правни лица. Пакетот би можел да биде еден од најголемите потези на санкции од Брисел од почетокот на конфликтот во Украина.
Според информациите објавени од Политико, новиот список треба да биде финализиран пред октомврискиот собир на лидерите на ЕУ, кога се очекува и неговото усвојување.
Британски медиуми претходно јавија дека се очекува Европската служба за надворешни работи да го претстави новиот список на земјите-членки на почетокот на септември, со цел усвојување на санкциите во октомври. Мерките наводно би вклучувале забрани за патување и трансакции како и замрзнување на средствата за санкционираните поединци и компании.
