Денес ширум светот се откажани повеќе од 4.000 авионски летови, од кои повеќе од половина во САД, поради неповолните временски услови, но пред се поради зголемувањето на бројот на заразени со „омикрон“ варијантата на корона вирусот.
Според податоците од сајтот за глобално следење на авио-летови, Флајт авер, вчера до 20 часот по Гринич беа откажани повеќе од 2.400 летови до и од Соединетите Американски Држави, а повеќе од 11.200 летови се одложени на неопределено време, до натамошно известување.
Меѓу авиокомпаниите што имаа најмногу откажани летови се „Скај Вест“ – 510 и „Саут вест“ – 419.
Божиќните и новогодишните празници се време кога повеќето луѓе патуваат со авион, но брзото ширење на високо преносливата варијанта на корона вирусот „омикрон“, доведе до нагло зголемување на бројот на заразени, принудувајќи ги авиокомпаниите да ги откажат летовитезатоа што голем број на пилоти и членови на екипажот мораат да останат во карантин.
Транспортните агенции низ САД, исто така, го суспендираа или го намалија обемот на работа поради недостаток на персонал, бидејќи е потврдено дека голем број вработени се заразени со корона вирусот.
Во последните 24 часа, надлежните американски служби регистрирале 346.869 новозаразени со корона вирусот, а бројот на починати заболени од Ковид во истиот период изнесува 377.
