Рапсодија во бело на „Шукру Сарачоглу“ стадионот во Истанбул. Вардар со уште една победа го елиминира Фенербахче, овој пат со 2-1, и со вкупни 4-1 го елиминираше силниот противник, па утре ќе се најде во ждрепката за групната фаза од Лига Европа.
Скопските црвено црни испишаа историја, го победија големиот Фенербахче и ќе се натпреваруваат во групната фаза од едно големо европско натпреварување.
Чеде Јаневски во натпреварот влезе со три замени, од кои една принудна поради црвениот картон на Грнчаров. Дарко Велковски го зазеде неговото место, Брдаровски беше во составот на местото од Демири, а Џигаури наместо Којашевиќ.
Вардар се одлучи за дефанзивна игра, момчињата на Јаневски со многу пожртвуваност и дисципилнирана игра му се спротивставуваа на противникот.
Во првото полувреме Фенербахче имаше неколку полушанси, но ниту еднаш посериозно не го загрози голот на Гачевски.
Најдобрата шанса за Вардар во првото полувреме ја имаше Барсегјан во 41. минута, кога по додавањето од Хамбарѕумјан се најде во идеална можност, биеше, но ја погоди стативата од голот на Камени.
Во второто полувреме Фенербахче тргна поенергично кон голот на Вардар. Во 53. минута Туфан од идеална позиција биеше со глава, но Гачевски беше на вистинското место.
Во 61. минута домаќините поведоа со 1-0. По корнер, Шкртел со глава спушти до Нојштатер кој постигна гол за водство на Фенербахче.
Но само седум минути подоцна Вардар ги замолкна домашните навивачи. Џигаури најдобро се снајде во голманскиот простор на домаќините и ја „протна“ топката во мрежата на Камени за израмнување на 1-1.
Во 71. Вардар можеше да поведе, Барсегјан се најде во одлична можност, шутираше, но овој пат пречката беше сојузник на Камени.
Вардар имаше прилики преку Барсегјан, Фелипе, Спировски, но Камени беше на висина на задачата.
Тоа што не им успеа Барсегјан, Фелипе и Спировски, му појде од рака на Николов. Тој во последните моменти од мечот постигна гол за победа на Вардар од 2-1!
