Со 62 гласа „за“, еден „воздржан“ и ниту еден „против“ Собранието попладнево го избра д-р Венко Филипче за министер за здравство.
Премиерот Зоран Заев пред пратениците образложи дека поради локалните избори, а заради правото на избор на тогашниот министер за здравство Арбен Таравари да биде кандидат за градоначалник му престана мандатот и оти за нов член на Владата кој ќе раководи со ресорот здравство го предлага Венко Филипче.
„Се надевам дека денеска Парламентот ќе донесе одлука за избор на министер со што Владата би била комплетирана“, наведе Заев.
Новиот министер за здравство, д-р Венко Филипче (Скопје, 1977), дипломирал на Медицинскиот факултет во Скопје во 2001 година, специјализација по неврохирургија почнал во 2003 година а ја завршил во 2008 година. За асистент на Медицинскиот факултет во Скопје е избран во 2004 година, магистрирал во 2011 и докторирал во 2015. Оваа година е избран за доцент на Медицинскиот факултет.
Се усовршувал во неврохируршките центри во Грац, Белград, Дејтон, Колумбус, Истанбул, Цирих. Во 2012 година завршил фелоушип по интервентна неврорадиологија со што станал прв неврохирург во околните земји кој ја основа хибридната неврохирургија на Клиниката во Скопје.
Публикувал во повеќе домашни и странски списанија во областа на неврохирургијата. Секретар е на Македонското неврохирушко здружение и на Здружението на неврохирурзи на Југоисточна Европа.
Бил покануван за предавач на конгреси организирани од различни асоцијации од областа на медицината и од неврохирургијата во Европа и во светот. Оженет и татко на еден син.
На 27. седница на Собранието за министер без ресор задолжен за спроведување на Стратегијата на Ромите е избран Аксел Ахмедовски, кој доаѓа на местото на Самка Ибраимовски. Воедно Собранието го разреши Власте Димковиќ од функцијата заменик-министер за земјоделство, шумарство и водостопанство и на негово место го именуваше Благе Цветковиќ. За заменик-министер за образование, пак, е избран Арбр Адеми.
На почетокот на седницата беа констатирани оставките на претседателот на Државната изборна комисија Александар Чичаковски, потпретседателот на ДИК, Реџеп Прекопуца, како и на членовите на ДИК Атанас Урумов, Игор Милев, Субхи Јакупи, Виолета Дума, Сашо Срцев и Силвана Бонева.
Ним, како што наведе претседателот на Собранието Талат Џафери, им престанува функцијата и ангажманот во ДИК на лично барање, а пред истекот на мандатот.
