ВМРО-ДПМНЕ нема да присуствува на седницата во Собрание на чиј дневен ред е симнување на имунитетот на шестмината пратеници од коалицијата на ВМРО-ДПМНЕ поради притвор за насилните настани на 27 април во парламентот.
„ВМРО-ДПМНЕ ги разгледува сите возможни опции за да се спротистави на ова безумије и да се стави во заштита на луѓето кои неправедно се дел од политички монитрани процеси без разлика дали тоа се пратеници, официјални лица или обични граѓани, чии единствен грев е што се дрзнале врз основа на својата совест и убедување да се спротистават на политиките на СДСМ.
Овој политички прогон мора да запре“, соопштија од ВМРО-ДПМНЕ.
За симнување на имунитетот потребно е просто мнозинство односно 61 глас. Заседанието на парламентот за одземање на имунитетот, собранискиот спикерот го закажа откако вчера комисијата за деловничко и мандатно – имунитетни прашања со поединечно гласање одлучи да им го симне имунитетот на шестмината пратеници.
Шестемина пратеници се дел од 36-те лица кои основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието.
