Популистичка атиреформа за политички поени, вака го оквалификува ВМРО-ДПМНЕ најавеното укинување на екстерното тестирање од страна на новото парламентарно мнозинство, додавајќи дека тоа ќе предизвика криза на вистинските вредности.
Екстерното тестирање на реалното знаење се применува во сите европски земји, а тоа што СДСМ го предлага е само популистичко додворување на дел од родителите и учениците и нивна злоупотреба заради политички поени, рече Спиро Ристовски од ВМРО-ДПМНЕ на прес-конференција.
Со ова укинување СДС само ќе им направи контра услуга на среден и долг рок, бидејќи го враќа повторно на мала врата образовниот процес од времето на транзицијата кога оценките не беа одраз на знаење, туку резултат на притисоци врз наставниците, влијанија од страна на родителите и спуштање на критериумите кои потоа ќе се одразат на пазарот на трудот, рече Ристовски.
Оваа популистичка антиреформа на СДС, ќе предизвика криза на вистинските вредности. Децата ќе бидат изедначени по оценки и нема да се вреднуваат трудот и квалитетот.
СДС наместо да нуди конкретни мерки за подобрување на квалитетот на образованието, прави чекори од кои потоа во иднина ненадоместлива штета ќе трпат пред се децата и нивните родителите.
Децата ќе станат неконкурентни на меѓународните пазари на труд каде се бара вистинско знаење, рече Ристовски.
Тој истакна дека ако СДСМ имале визија и капацитет ќе предложеле мерки за подобрување на квалитетот на екстерното, а немало да брзаат да го укинат.
Потоа тој додаде дека според ВМРО-ДПМНЕ, сега приоритетно прашање е да се продолжат мандатите на советите и градоначалниците преку прифаќање измени во Законот за избори, изјави Ристовски.
