На Волстрит, цените на акциите паднаа, втор ден по ред, бидејќи инвеститорите не сакаат да ризикуваат пред извештајот за работните места во САД и затоа што лидерите на американската централна банка постојано порачуваат дека следи зголемување на каматите.
Дау Џонс (Dow Jones) загуби 1,15 отсто, и сега чини 29.926 поени, додека СиП 500 (S&P 500) се лизна за 1,02 отсто, на 3.744 поени, а индексот Насдак (Nasdaq) 0,68 отсто, на 11.073 поени.
По силниот скок на почетокот на неделата, овие индекси паднаа втор ден по ред бидејќи инвеститорите не сакаат да ризикуваат пред американскиот извештај за работните места што треба да излезе денес, а кој би можел да има значително влијание на пазарот.
На почетокот на неделата цените на акциите нагло пораснаа токму поради тоа што на пазарот преовладуваше мислењето дека ФЕД може да го забави темпото на зголемување на каматните стапки. Сепак, челниците на централната банка од ден на ден повторуваат дека не се откажуваат од своите приоритети.
Чарлс Еванс, претседател на филијалата на ФЕД во Чикаго, вчера изјави дека очекува дополнително зголемување на каматните стапки за 1,25 процентни поени до крајот на годината, бидејќи податоците за инфлацијата се разочарувачки.
Поради ова, пазарот на пари сега проценува дека ФЕД ќе ги зголеми клучните камати стапки за агресивни 0,75 процентни поени на дводневната сесија на 1 и 2 ноември, четврта сесија по ред.
Инвеститорите стравуваат дека агресивното зголемување на каматите може да предизвика рецесија.
Поради зголемувањето на каматите на ФЕД и забавувањето на економскиот раст, индексот СиП 500 (S&P 500) е намален за околу 22 отсто од рекордното високо ниво, кое беше постигнато на 3 јануари.
Цените на акциите вчера паднаа и на европските берзи. Лондонскиот ФТСЕ (FTSE) индекс ослабе за 0,78 отсто, на 6.997 поени, додека франкфуртски ДАКС (DAX) се „лизна“ за 0,37 отсто, на 12.470 поени, а париски ЦАЦ (CAC) 0,82 отсто, на 5.936 поени.
(Фото: Престиж – The Prestige)
