Младиот фудбалер на данскиот Копенхаген, Руни Барџи, би можел веќе во јануари следната година да премине во Манчестер Јунајтед, но само под услов – да не успее планираното „киднапирање“ од страна на Челзи.
Барџи пред точно седум дена наполни 18 години, а последните неколку сезони игра маестрално во Копенхаген. За данскиот клуб одигра 57 натпревари и постигна 15 голови. Роден е во Кувајт, а досега настапуваше за младинските репрезентации на Шведска.
Претходната недела блесна на мечот од Лигата на шампионите против Манчестер Јунајтед, а со голот во 87 минута донесе победа за Копенхаген (4:3).
Британските медиуми наведуваат дека отштетата за младиот фудбалер е околу 15 милиони евра, а новото раководство на Манчестер Јунајтед сака Барџи да биде првото засилување на англискиот клуб во зимскиот преоден рок.
Меѓутоа, според последните информации од фудбалскиот огранок на најголемиот американски спортски медиум, ЕСПН, за услугите на младиот фудбалер и тоа како е заинтересиран Челзи.
Левокрилниот напаѓач, кој има исклучителна техника и брзина, и самиот е заинтересиран да ја продолжи кариерата во Премиер лигата, па останува да се види „кон кое царство ќе се приклучи“.
Се разбира, за ова во голем дел се прашува и неговиот сегашен клуб, но дека работите станаа доста сериозни говори и тоа што Барџи ангажираше нова, сериозна менаџерска агенција да го застапува.
(Фото: Ројтерс)
