Скриен во пакувања урми, спакувани во кутии, грчката полиција во товарен брод на атинското пристаниште Пиреас, откри и заплени над еден тон преработен канабис, јави дописничката на МИА од Атина.
Товарниот брод што бил регистриран дека пренесува „прехранбени производи“ на 21 декември 2019 тргнал од Бејрут, крајната дестинација бил градот Мисурата во Либија, а Пиреа било транзитно пристаниште.
Како што соопштија од грчката полиција, во бродот биле откриени 2.279 картонски кутии со прехранбени производи, а во нив во смеса од урми биле скриени 6.304 пакувања со преработен канабис со вкупна тежина од еден тон и 257 килограми и 535 грама.
Канабисот бил откриен во акција во која учествувал Секторот за борба со дрога на грчката полиција, Дирекцијата за борба со економски криминал од Министерството за финансии на Грција, а во соработка со канцеларијата на американската служба за борба со дрога во рамките на амбасадата на САД во Атина и Дубаи и надлежните власти од Саудиска Арабија.
