Забраната за влез и излез од Дебар и Центар Жупа остави заглавени стотина лица, главно од гостварскиот регион и подрачјето на Река, општина Маврово и Ростуше.
Станува збор, главно за занаетчиски работници- монтери, но и лица кои биле во посета на свои роднини пријатели.
„Дел од нив ноќта ја минаа кај своите роднини пријатели, а дел беа сместени во хотелски капацитети. За сите нив треба да помине потребната процедура“, велат од Оперативниот штаб на Дебар.
Инаку, во текот на ноќта повторно е извршена дезинфекција на деловите на градот,кои се жаришта на вирусот а редовно се мијат улиците низ градот.
Од вчера попладне поставени се полициски пунктови на излезот кон Маврово и кон Струга,односно кај месноста Бошков Мост и кај Хидроелектраната „Шпилје“,потоа на Мелнички Мост на влезот кон Центар Жупа и кај ХЕ„Глобочица“ на излезот од оваа општина кон Струга.
„Поради состојбата со корона вирусот и мерките кои важат за општините Дебар и Центар Жупа поставена е полициска контролна барикада пред Бошков Мост што значи дека не смее да се оди за Дебар како и за селата Лазарополе, Гари, Тресонче и другите села од тоа место“, информираше градоначалникот на општина Маврово Ростуше, Медат Куртовски преку својот профил на фејсбук.
Тој упатува апел за разбирање и максимално почитување на препораките.
