Новатa група на Американци во Северна Македонија кои ќе служат како волонтери во Мировниот корпус завчера пристигнаa во земјава. Тие ќе го споделат своето знаење и искуство преку волонтирање во различни институции, училишта и организации низ земјата.
Како што се наведува во соопштението, волонтерите беа пречекани на аеродромот од страна на директорот на Мировен корпус во Северна Македонија, Дејвид Рисајд, како и дел од вработените.
-Мировниот корпус го поздравува пристигнувањето на 50 Американци во
државата кои ја претставуваат 28-та група волонтери на Мировен корпус што ќе служи во Северна Македонија. Ова е една од најголемите групи американски волонтери кои пристигнале во скоро 30 години работа на Мировниот корпус во оваа земја. По завршувањето на 11 недели обука која опфаќа учење јазик, култура, и технички вештини, овие волонтери ќе бидат распределени да живеат и работат во различни заедници низ целата земја. Мировниот корпус е благодарен за соработката со Владата и нашите партнери, со која успеавме да поддржиме речиси 940 волонтери да служат овде од 1996 година па сѐ до денес, вели директорот на Мировен корпус, Дејвид Рисајд.
За време на нивниот двогодишен престој во Северна Македонија, волонтерите ќе работат како наставници по англиски јазик во училиштата, како и во полето на инклузивното образование и на развој на заедницата – во невладините организации и општините.
Мировниот корпус, како што се наведува во сооптението, има одлична соработка со своите локални и национални партнери и ги спроведува своите програми во партнерство со Министерството за образование и наука и Министерството залокална самоуправа.
Волонтерите својата служба во земјата ќе ја започнат официјално во декември по давањето свечената заклетва.
