Телата на 225 лица убиени во немирите во Казахстан минатата недела, меѓу кои и 19 припадници на безбедносните сили, се однесени во мртовечници ширум земјата, соопштија од канцеларијата на главниот обвинител.
Претставникот на обвинителството, Шерик Шалабаев, рече на брифингот дека тука имало цивили и вооружени „бандити“ кои биле убиени од безбедносните сили. Тој додаде дека бројот на загинати може да се зголеми.
По големиот скок на цените на горивото, на почетокот на овој месец во оваа централноазиска земја богата со нафта почнаа насилни протести. Податоците кои ги наведе Шалабаев потврдуваат дека станува збор за немири со најголем број загинати во постсоветската историја на земјата.
На протестите се приклучија 50.000 луѓе од целата поранешна советска република, а кулминираа на 5 јануари кога толпа луѓе упаднаа и запалија владини згради, автомобили, банки и продавници во неколку поголеми градови.
Претседателот Касим-Јомарт Токаев се обрати до воениот блок предводен од Русија за помош и со преземањето на Советот за национална безбедност го стави на своја страна својот поранешен покровител и претходник, Нурсултан Назарбаев.
