Во експлозија на бомба скриена во гајба со зеленчук на пазар на северот на Пакистан загинаа најмалку 35 лица. Неколку часови пред тоа двајца полицајци и тројца бомбаши-самоубијци, смртно настрадаа при нападот на кинескиот конзулат во Карачи.
Несреќата во Карачи среќно ја избегнаа сите вработени во кинеското дипломатско претставништво, кои се префрлени на сигурно.
Според зборовите на Амир Шаик, шеф на полицијата во Карачи, тројцата напаѓачи дошле со автомобил полн со експлозив, но не успеале да влезат во кругот на конзулатот.
Обраќајќи им се на медиумите во пакистанската престолнина Исламабад, шефот на дипломатијата, Шах Махмуд Куреши, истакна дека „напаѓачите не можеле да ги повредат вработените во конзулатот, ниту можеле да ги земат како заложници“.
„Премиерот нареди истрага за да се утврди кој стои зад овој бомбашко самоубиствен напад. Несомнено е дека е во прашање завера чија цел е поткопување на економските и стратешката соработка меѓу двете држави. Ваквите инцидентиикогаш нема да можат да ги расипат односите меѓу Пакистан и Кина“, соопштија од кабинетот на премиерот Имран Кан.
Нападот го осудија пакистанските, кинеските и индијските власти.
Кина е најблизок сојузник на Пакистан, која во него, низ различни активности, вложи повеќе од милијарда долари.
Карачи се наоѓа недалеку од границата со нестабилниот регион Балоџистан, на југозападот на Пакистан.
Овој регион е срце на амбициозниот заеднички проект на Кина и Пакистан, поточно, на кинеско-пакистанскиот коридор, потсетуваат светските медиуми.
Вториот напад, во градот Калај, во близина на границата со Авганистан, каде што живее претежно шиитско население, се случи на пазарниот ден. Бомбата експлодираше на самиот влез во верски објект, рече официјалниот преставник на градот Калиб Игбал.
Во петокот, пак, џамијата во источната авганистанска провинција Кост, внатре во воената база во дистриктот Исмаил Кел, беше цел на бомбашки напад во кој загинаа најмалку 27 луѓе, а повредени беа 57. настрадаа верници кои се собрале да присуствуваат на петочна молитва. Претседателот на Авганистан Ашраф Гани го осуди нападот, нарекувајќи го антиисламски и нехуман.
