Познатата канадска пејачка Селин Дион го одржа својот прв концерт по шестгодишно отсуство поради ретка и многу опасна болест, на големо задоволство на нејзината бројна публика.
Публиката, во која имаше и француски актери и познати личности, ја поздрави славната пејачка со овации и стоечки аплауз, како што пренесоа речиси сите француски медиуми.
„Сакам да кажам дека сум добро. Научив да живеам со кревкоста. Живеам со неа, ја скротив и одлучив да ја претворам во извор на животна сила“, изјави Селин Дион во саботата вечерта, пред 30.000 гледачи собрани во арената во Нантер, западно од Париз.
Селин Дион (58) пееше два и пол часа, со паузи во кои беше преплавена од емоции на радост додека ѝ се обраќаше на публиката, објави парискиот весник „Ле Монд“.
„Тоа се солзи радосници, пресреќна сум што ве гледам“, изјави пејачката, која веќе неколку дена престојува во хотел во Париз, каде што неколкупати спонтано се појавуваше пред зградата за да ги поздрави обожавателите што чекаа да ги повика. Многу обожаватели допатуваа на концертот од разни делови на Франција, некои спиеја пред хотелот, додека нејзините песни одекнуваа од околните згради и преку ден и навечер, пуштани од станари и вработени во приватни фирми, директно од нивните балкони. Откако нејзината последна турнеја беше откажана во март 2020 година поради пандемијата на коронавирусот, Селин Дион не можеше да се врати на сцената поради болест.
Пејачката боледува од „синдром на вкочанета личност“ (Stiff-Person Syndrome) – ретка и неизлечива невролошка болест што ги напаѓа и парализира мускулите; таа се соочува со оваа состојба веќе дваесет години, иако дијагнозата ѝ беше поставена дури во 2022 година. Соочена со тешка епизода на парализа на делови од телото, вклучувајќи ги мускулите околу вратот и грлото, пејачката – која значително изгубила на тежина – сподели загрижувачки вести за своето здравје на социјалните мрежи, пред целосно да се повлече од јавноста за да се посвети на лекувањето.
Затоа, вистинско изненадување беше кога, две години подоцна, таа повторно се појави на врвот на Ајфеловата кула за време на церемонијата на отворање на Олимписките игри во Париз во 2024 година, изведувајќи ја антологиската песна на Едит Пјаф, „L’Hymne à l’amour“.
Фото: принтскрин
