Идниот претседател на Србија, Александар Вучиќ вели дека е срамно тоа што Македонија му ги дала, на Горан Живаљевиќ од амбасадата на Србија во Македонија и новинарот Мирослав Лазански од Белград, записите од прислушуваните разговори на Иван Стоилковиќ, лидер на Демократската партија на Србите. Според Вучиќ не е виновна Македонија туку странска западна служба, пренесува Н1 телевизијата.
Во Србија прислушувани разговори не се објавувани во медиумите во последниве години, барем не оние по 2012 година. Се разбира дека ги има, во согласност со законот, но не и во медиумите. Одговорни земји се однесуваат на одговорен начин – рече тој во интервју на ТВ Пинк.
Вучиќ исто така праша зошто македонската власт го следела и прислушувала новинарот Мирослав Лазански и рече дека е срамота тоа што е направено. Според идниот српски претседател, од странство имало огромни притисоци и биле вложени многу пари за соборување на неговата влада, но за да се обелодени тоа е „потребна одредена историска дистанца“.
Српската мрежа за истражување, криминал и корупција, КРИК, објави транскрипти од македонското УБК од прислушувани разговори меѓу српскиот новинар Лазански, македонскиот пратеник Стоиљковиќ и припадникот на српската тајна служба Живаљевиќ.
Според транскриптите тие спроведувале медиумска пропаганда во Македонија во корист на поранешниот премиер Никола Груевски и на руската политика. Македонските служби заклучуваат дека овие разговори меѓу Живаљевиќ, кој за време на насилствата во Собрание на 27 април бил снимен во собраниската зграда, и Стоиљковиќ „недвосмислено упатуваат дека разузнавачот директно ги насочува и контролира активностите на пратеникот, а преку него, посредно се обидува да влијае и врз политичката состојба во Македонија“.
Од содржината на разговорите може да се констатира дека и присуството на новинарот и аналитичар Мирослав Лазански во Македонија е организирано со помош на Горан Живаљевиќ, кој исто така организира со кого новинарот ќе контактира и врши негов брифинг и дебрифинг – стои во транскриптот.
Снимените разговори се во периодот од трети до 5 март годинава.
Вчера пак, Стоиљковиќ за новинската агенција „Спутник“ изјави дека ќе ги тужи македонските служби затоа што го прислушкувале.
Кога некого не можете да го замолчите и немате ништо спорно поврзано со неговата личност, тогаш прибегнувате кон разни измислици – изјавил Стоиљковиќ.
Според него нема логика судот да издаде наредба за примена на ПИМ мерки за него, бидејќи поседува безбедносен сертификат.
Ако прислушувате пратеник и го ставите на таканаречени ПИМ мерки, морате да имате одлука на судот, а за да добиете одлука на судот, мора да дадете образложение.
Не знам и не сум свесен какво образложение би можело да биде за јас да бидам прислушуван кога имам безбедносен сертификат – вели Стоиљковиќ и додава дека ако не постои таква судска одлука за мое прислушување, тогаш ќе тужи и ќе бара отштета.
