Претседателот на Србија, Александар Вучиќ, вечерва изјави дека ги дал „најважните наредби, кои Советот за национална безбедност ги прифатил“.
„Ние презедовме соодветни мерки за заштита на нашата татковина, и во склад со тоа ги издадов најважните наредби и Советот за национална безбедност ги прифати и морам да кажам дека сум многу горд на нашите војници и полицајци. Пред да добијат каква било наредба да ја подигнат борбената готовност, ние ќе се обидеме милион пати пред тоа да го зачуваме мирот“, изјави Вучиќ за РТС по седницата на Советот за национална безбедност одржана во врска со актуелната ситуација на Косово.
Тој наведе дека никој од Белград не ги наредил барикадите и додаде дека тие „не се направени затоа што се нечиј хир, туку затоа што се форма на протест“. Вучиќ изјави и дека Албанците не се движат по тие блокирани патишта.
Претседателот на Србија ги повика Србите и Албанците да го зачуваат мирот и да ја смират ситуацијата. Тој на Србите во Косово им порача да останат смирени и присебни.
„Денеска ми е најтешкиот ден откако сум претседател на Србија, веројатно ме очекува најтешката ноќ“, изјави Вучиќ.
Вучиќ наведе дека пред Србите во Косово е „тешка ноќ“.
Рече дека Белград има уверување од КФОР и ЕУЛЕКС дека нема да преземаат насилни акции против демонстрантите на барикадите на северот на Косово.
„Се надевам, и имаме уверување од КФОР и Европа, дека тие нема да преземат насилни дејствија против демонстрантите и се надевам дека така ќе биде. Ќе продолжиме да разговараме со нив, тоа е наша работа, ќе направиме се за да ги зачуваме мирот и стабилноста“, рече српскиот претседател.
„Се случува тоа што го најавувавме и вчера и претходните денови и недели“, додаде уште Вучиќ.
Вели дека на самиот терен имале „тешка борба за опстанок на еден народ на неговите огништа“.
Претседателот на Србија оцени дека е очигледно дека многу луѓе „нема да бидат загрижени ако нешто се случи на Косово“ и додаде дека нивна должност е да повикаат на мир.
„И бараме никој случајно да не ги допре припадниците на КФОР и ЕУЛЕКС, и тоа е многу важна порака“, рече Вучиќ.
Да потсетиме, вечерва околу 19 часот во Белград, во зградата на Генералниот секретаријат, се одржа седница на Советот за национална безбедност со која претседаваше претседателот, Александар Вучиќ.
На седницата, меѓу другите, присуствуваа и премиерката, Ана Брнабиќ, министерот за полиција, Братислав Гашиќ, директорот на БИА, Александар Вулин, министерката за правда, Маја Поповиќ, директорот на Канцеларијата за Косово и Метохија, Петар Петковиќ, и началникот на Генералштабот на војската на Србија, генерал Милан Мојсиловиќ.
Србите од северот на Косово во саботата поставија барикади во знак на протест против апсењето на поранешниот припадник на косовската полиција Дејан Пантиќ.
