Деведесет и седум проценти од жителите на Гевгелија на референдум гласаа „против“ отворање на рудници за ископ на минерални суровини на територија на општината.
Според првичните неофицијални информации „за “ биле 154 гевгеличани додека „против“ се 13.097 гласачи.
Од општинската изборна комисија наведуваат дека сега течат роковите за жалби.
Фактот дека над 13 илјади гевгеличани или околу 70 отсто од запишаните 19.459 во Избирачкиот список денеска излегоа на гласање, исполнет е законскиот праг од над 50% излезност, што значи дека одлуката на граѓаните ќе биде обврзувачка за локалната самоуправа.
Иницијаторите за референдумот се задоволни од излезноста на граѓаните.
Mониторинг тимот на „ЦИВИЛ“ регистрираше повеќе помали нерегуларности во целиот процес, меѓу кои неинформираност на гласачи, неколку случаи на групно гласање и проблеми со избирачкиот список.
Референдумот во Гевгелија беше инициран од граѓанското здружение „Спас за Гевгелија“, откако канадски компании вршеа детални геолошки истражувања за рудно богатство на планината Кожуф.
