Градоначалничката на Скопје, Данела Арсовска, е разрешена од функцијата претседателка на Заедницата на единиците на локална самоуправа (ЗЕЛС).
На денешната седница на ЗЕЛС, на барање на градоначалниците од редовите на ВМРО-ДПМНЕ, беше предложено Арсовска да биде разрешена, а на нејзиното место да биде Орце Георгиевски, градоначалникот на Кисела Вода.
Членовите на Управниот одбор едногласно го прифатија овој предлог.
Веднаш по ваквата одлука со соопштение се огласи Арсовска. Со денешниот чин, вели, јасно се покажала коалицијата помеѓу СДСМ и ВМРО-ДПМНЕ.
„Ова е само последниот пример за соработката помеѓу двете партии на штета на граѓаните за нивните лични и теснопартиски интереси. На постојниот политички естаблишмент очигледно му пречат луѓе со визија, вредни и чесни, луѓе кои се независни и делуваат исклучително во интерес на граѓаните. На СДСМ и ВМРО-ДПМНЕ очигледно им пречат луѓе кои знаат да кажат не на корупцијата и криминалот, луѓе кои јавниот го ставаат пред бизнис интересот на врхушката во партиите“, стои во соопштението.
Данела Арсовска беше избрана за претседателка на ЗЕЛС во декември 2021 година, а нејзини потпретседатели беа градоначалниците на Валандово и Чаир, Перо Костадиновски и Висар Ганиу.
