Градскиот трговски центар во Скопје ќе добие зелен покрив што ќе се простира на повеќе од 1.800 квадратни метри. Градоначалникот на Скопје, Петре Шилегов, на денешната пресконференција информира дека проектот е финансиран од Град Скопје, а врз основа на Меморандумот за соработка меѓу УНДП и Градот, во рамки на Програмата „Отпорно Скопје“. Како што посочи Шилегов, за проектот се обезбедени околу 32 милиони денари. Зелениот покрив, очекува, веќе во текот на летото граѓаните да може да го употребуваат.
„Ќе бидат изградени неколку големи површини, ќе бидат засадени над 29 висококвалитетни повеќегодишни дрва, а ќе има моменти за забава, во смисла на хоризонтален шах со големи фигури, една летна сцена каде што граѓаните ќе можат да поминуваат и кафетерија, рече Шилегов.
Постојаниот претставник на УНДП, Нарине Сахакјан, појасни дека ова е нова технологија со што се дава осврт на новите опасности од климатските промени, односно топлотните бранови, со кои Скопје е загрозено. Додаде дека интересен факт е тоа што летно време, кога температурата на градскиот плоштад е 27 Целзиусови степени, на покривот на Градскиот трговски центар е 37 Целзиусови степени, што значи дека температурата е повисока за десет степени.
„Ова е еден од заедничките проекти во кои треба да се зголеми отпорноста на градот на климатските промени и каде што ќе се применат најнови технологии во градење на таквата отпорност и решавање на проблемите, рече Сахакјан.
