Една година по исклучувањето на Русија, лидерите на 46-те земји членки на Советот на Европа денеска се среќаваат на самит на Исланд, за да го покажат своето единство против Москва.
На самитот, само четврти на оваа паневропска организација во речиси 75-годишното постоење, ќе се разговара за кривична одговорност на Русија, одговорна за уништување и злосторства предизвикани од нејзината инвазија на Украина.
Доаѓаат Шолц, Макрон, Сунак, Мелони…
Германскиот канцелар, Олаф Шолц, францускиот претседател, Емануел Макрон, британскиот премиер, Риши Сунак, и неговата италијанска колешка, Џорџија Мелони, кои од сабота го примија украинскиот претседател Володимир Зеленски, ќе го предводат европското семејство во Рејкјавик.
Што се однесува до украинскиот претседател, кој е повикан како шеф на држава на една земја членка, неговото присуство се уште е неизвесно.
Европа се обидува да демонстрира единство
Вчера, Зеленски на Твитер објави дека „се враќа дома“ после европската турнеја што го однесе во Рим, Берлин, Париз и Лондон, со ветувања за „ново моќно оружје“ во моментите кога неговата земја подготвува контраофанзива против руските сили.
Додека Москва сигнализира долга војна и покрај големите загуби, Европа се обидува да покаже дека е обединета зад Киев.
„Ќе продолжиме да ја поддржуваме Украина се додека е потребно“, рече вчера претседателката на Европската комисија, Урсула фон дер Лајен.
„И ништо нема да се реши за Украина без Украина“, вети таа, во време кога Киев се грижи дека ќе се најде под притисок на своите сојузници да преговара со Москва, доколку брзо не ги постигне очекуваните воени успеси.
Суд за Украина
Исландските организатори се надеваат дека речиси 24-часовниот самит, кој го поттикна мирниот Рејкјавик да донесе полициско засилување од странство, ќе доведе до „опипливи резултати“.
Посебно мора да се покрене „регистар на штети“ предизвикани од инвазијата на Русија, откако Меѓународниот кривичен суд издаде налог за апсење на рускиот претседател Владимир Путин.
Тој регистар би бил „првиот чекор, и тоа голем чекор, кон отштетата која би требало да ја плати Русија“, рече Фон дер Лајен, која како и другите во Европа се залага за формирање на посебен (специјален) суд за воени злосторства за Украина, веројатно во Хаг.
На тркалезната маса, а потоа и на вечерата на европските лидери, мора да се прецизира „како Советот на Европа може активно да им помогне на Украинците, како членови на ова големо европско демократско семејство“, соопштија од Елисејската палата.
Демократски пад во Европа
Русија до март 2022 година беше членка на Советот на Европа, редок европски или западен форум чиј дел беше и Москва.
Покрај 27-те членки на ЕУ, Советот на Европа вклучува уште дваесет нации и има вкупно 675 милиони жители. Најпознат е по својот Европски суд за човекови права.
Според Рејкјавик, на состанокот исто така мора да се разгледа и „демократскиот пад забележан во Европа“, како и актуелните теми како што е вештачката интелигенција.
Самитот е и еден вид увертира на состанокот на Г7 што почнува в петок во Јапонија, каде што Макрон, Сунак, Шолц и Мелони ќе се сретнат со американскиот претседател Џо Бајден.
(Фото: ЕПА)
