Министерката за правда Рената Дескоска најави дека референдум за името ќе се спроведува по постоечкиот закон, а дека потоа, по неговото завршување, ќе се донесе сосема нов закон, закон со современи стандарди.
Дескоска на гостувањето во емисијата „Топ тема“ на Телма телевизија, рече дека сега не треба да се прават какви било измени на законот, дури ни технички.
Со спроведувањето на референдумот по постоечкиот закон, смета таа, ќе се отфрлат сомневања дека нешто се сака да се подметне.
„Факт е дека законот е застарен, дека е нефункционален и многу прашања ги остава со прашалници, но факт е и дека врз основа на тој закон беа спроведени референдуми како оној во општина Центар за изгледот на Градскиот трговски центар или во неколку други општини за рудниците, рече Дескоска.
Десковска се осврна и на Државната изборна комисија. Лошо е, смета министерката, изборот на членови на комисијата да се условува со други прашања бидејќи тоа е комисија која треба да постои имајќи ги предвид нејзините надлежности не само за референдумот, туку и за други прашања како што е она за Избирачкиот список.
Во однос на реформите во судството истакна дека нема да се брза со реформите во судството и оти наместо на квантитет, ќе се посвети внимание на квалитетот на законските решенија. Законите кои ќе се подготвуваат ќе бидат ставени на јавна дебата, со цел да се изнајдат најдобри решенија. Една од заложбите во новите законски решенија ќе биде да се формираат правила за објективно унапредување на судиите.
Ставот на Дескоска во однос на Специјалното јавно обвинителство, е дека е добро ова Обвинителство да прерасне во трајно обвинителство кое што ќе се занимава со криминалот на високи носители на политички функции.
„Планот е практично со склопување во Законот за јавно обвинителство да се овозможи внесување на СЈО во делот на овој Закон. Но, свесни сме дека тоа е закон којшто се носи со двотретинско мнозинство и за кој ќе ни биде потребна согласност од пратениците на ВМРО-ДПМНЕ, така што ќе се обидеме, но не можеме да претпоставиме дали ќе добиеме согласност за спроведување на оваа реформа“, рече Дескоска.
На крајот Дескоска се осврна и на одметнатите Горан Грујовски и Никола Бошковски, обвинети за повеќе кривични дела во Македонија, за кои Врховниот суд во Атина го одби барањето за екстрадиција.
„Ќе го обновиме барањето и ќе објасниме дека помилувањето било незаконско и од тие причини неможе да се смета дека има ретроактивно дејство на законите“, појасни министерката за правда.
