Министерката за правда, Рената Дескоска, која е и универзитетски професор по уставно право, се огласи на својот Фејсбук профил за предлогот на ВМРО-ДПМНЕ за технички министер за внатрешни работи.
„Покрај толку советници од Правен, да пуштиш противуставен предлог?!“, напиша Дескоска на Фејсбук.
Нејзиниот став го заснова на членот 97 од Уставот, што пропишува: „Со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години“.
Дел од медиумите претходно објавија дека предлогот на ВМРО-ДПМНЕ за технички министер за внатрешни работи е Драган Ковачки, кој доаѓа од АРМ и е со чин полковник. Тој има долга кариера во војската, меѓудругото и како Командат на 1. механизирана пешадиска бригада.
Претходно, лидерот на ВМРО-ДПМНЕ Христијан Мицкоски на средбите со лидерот на ДУИ Али Ахмети и со премиерот Зоран Заев, го презентираше предлогот на партијата за министер за внатрешни работи во преодната Влада, и рече оти се работи за професионалец и човек со исклучително богата кариера во службата онаму каде што досега работел.
Заев по средбата со Мицкоски рече дека се работи за воено лице и оттука излегува дилемата дали Уставот согласно член 97 тоа го дозволува, Законот за служба во Армијата и Законот за служба во МВР.
Посочи дека ќе се консултираат со експертите по ова прашање.
Ахмети по средбата со Мицкоски рече оти за нив е прифатлив предлогот на ВМРО-ДПМНЕ за технички министер за внатрешни работи.
Ахмети рече дека тоа е докажан професионалец кој не бил познат како политички активист, ниту, пак, активен во цивилното општество.
