Градоначалникот на општина Куманово, Максим Димитриевски, денеска положи свежо цвеќе пред спомен Костурница и се обрати пред присутните по повод 11 Октомври – Денот на народното востание. Рече дека 11 Октомври има посебно значење за кумановци.
„Ова е ден кога од Куманово започнала борбата за промени. Ова е ден кога од Куманово започнала револуцијата и отпорот против фашизмот. Ден кога започнала борбата за ослободување на државата. Овој ден со црвени букви е запишан во кумановската и македонската историја. Историјата е таа што ни дава основа да постоиме, сегашноста е подготовка за иднината, а иднината треба да биде подобра од минатото. Изгледа оваа лекција никако да ја научиме, бидејќи сегашноста требаше да биде подобра од минатото, а не да се плашиме дека иднината ќе ни донесе реприза на претходно видено минато“, истакна Димитриевски.
Според него, денес повеќе од кога било порано важно е да не заборавиме дека Македонците заедно со Србите, Албанците, Турците, Ромите, Власите се бореа против бугарскиот, германскиот и италијанскиот фашистички окупатор.
„Денес од кога било порано е важно да ги знаеме нашите корени, нашите битки, нашата историја, затоа што таа историја е корен на нашиот идентитет. Денес од кога било порано е важно да знаеме дека македонскиот идентитет не е и не смее да биде предмет на договори. Идентитетот не се брише со гума, не се менува, тој останува. Ние политичарите сме менлива категорија, а народот е тој истиот. Народот е тој што го носи идентитетот и никој, ама баш никој, не смее да си игра со тоа прашање. А ако некој сака да избрише дека сме се бореле против бугарскиот фашистички окупатор, тој тогаш историјата или не ја смета за своја, или има некаков друг проблем. Да не бидам погрешно сфатен, јас немам против ниту еден народ негативни чувства. Но, имам проблем кога некој се обидува да не претстави како дел од друга нација и друга историја. Е тогаш секој од нас има право да реагира. И бидете сигурни ваков случај, како нашиот македонски нема никаде во светот. Никаде на друго место не се негира постоењето на еден народ, и нема обиди за менување на историја и за бришење на делови, што на некого не му одговараат, рече Димитриевски
Вели дека има проблем со бришењето на зборот „бугарски“ од спомен плочите бидејќи и неговото, но и семејствата на потомците се бореле против тој окупатор.
„Јас имам проблем бидејќи никој од Бугарија досега не се извинил за злоделата што ги направиле во Македонија, по примерот на Германија и нивните канцелари Брант и Меркел, туку се обидуваат да ги избришат од историјата. Е па тоа не може да се случи! Не смееме да дозволиме тоа да се случи! Заради нашите предци, заради нашите поколенија. Мора да постојат црвени линии, кои не смееме да ги поминеме и мора да порачаме дека секој оној што сака да го стори тоа народот ќе го казни. Бидејќи овој народ знае да ја покаже својата сила најмногу кога некој го потценува. Овој народ знае да ја покаже својата сила кога некој сака да го понижи“, рече Димитриевски.
