Кристијано Роналдо и понатаму има статус на слободен играч откако мораше да го напушти Манчестер Јунајтед, поради интервју во кое ја навреди политиката на клубот и тренерот на тимот Ерик тен Хаг. Тоа наскоро би требало да се промени, бидејќи португалскиот напаѓач договорил се со Ал Наср, пренесува шпанскиот спортски весник „Ас“.
Претставниците на клубот од Саудиска Арабија и агентите на Кристијано Роналдо работата ја договориле на состанокот во вторникот.
Роналдо ќе го потпише договорот до летото 2025 година, односно таму ќе игра и откако ќе го прослави својот 40-ти роденден, наведува весникот, кој пишува и дека оваа вест ја потврдил извор од клубот.
Последните денови се пишуваше дека Роналдо ќе потпише договор според кој ќе заработува околу 200 милиони евра по сезона, но во текстот со кој се потврдува неговото заминување од европскиот фудбал тоа се демантира.
Истиот извор кој се споменува во потврдата на веста за договорената соработка се споменува и во темата за платата на Роналдо, а според него таа сепак ќе биде помала.
„Марка“ пишува дека толку ќе добие за исполнување на договорот за две и пол години и улогата на амбасадор за заедничката понуда на Саудиска Арабија, Египет и Грција за СП 2030 година.
Роналдо, и пред да го напушти Манчестер Јунајтед, се поврзуваше со многу европски клубови.
Беше незадоволен и бараше да си замине од „Олд Трафорд“, што на крајот и му успеа по интервјуто со Пирс Морган. После тоа доби спогодбен раскин на договорот.
Агентите го понудија на многу клубови низ најсилните европски лиги.
Дека Роналдо бил подготвен да појде во кој било клуб кој игра во Лигата на шампионите, натпреварување кое сака уште еднаш да го освои, потврди и изјавата на Аксел Хелман, директорот на Ајнтрахт. Неговата изјава ја пренесе новинар на германски „Спорт1“, а гласи: „Роналдо ни се понуди дури и нам“. Ова го изјави во интервју за „ДАЗН“, а на неговите зборови се надоврза и претседателот на Надзорниот одбор на клубот, Филип Холцер: „Имам чувство дека се понудил на сите клубови кои се пласираа во Лигата на шампионите“.
(Фото: „Марка“)
