Во основното училиште „Владислав Рибникар“, во белградската општина Врачар, утрово околу 8 часот имало пукање.
Ученик од седмо одделение со пиштол стрелал во наставници и ученици и кон обезбедувањето.
Мотивот за нападот засега не е познат.
Во улицата веднаш до школото се паркирани повеќе полициски коли и возила на Итна медицинска помош. Сите околни улици и приоди кон училиштето во моментов се затворени, а на терен се силни полициски сили.
Децата се евакуирани и се на безбедно растојание од местото на инцидентот
Според првите сеуште непотврдени информации убиен е чуварот на школото, а наставничка по историја е тешко ранета и има други повредени.
РТС информнира дека наставничка и три деца биле примени во Ургентниот центар во Белград, а дека сите имаат прострелни рани во пределот на градите.
Н1, пак, јавува дека заради настанатата ситуација затворени биле сите приоди со возила до „Ургентен“.
Пукањето се случило во ходникот на училиштето, а во училницата по историја бил пронајден ранец во кој имало пиштол и неколку шишиња со запалива течност.
Засега не е познато дали ранецот му припаѓа на напаѓачот.
Српски „Данас“ пишува дека четиринаесетгодишиот К.К. пет минути пред крај на првиот час влегол во училишната зграда и почнал да пука. Во информацијата се наведува дека детето било повлечено и дека никогаш немало проблем со кој било од неговите другари и со наставниците.
Од Министерството за внатрешни работи на Србија велат дека во 8.40 часот било пријавено дека во училиштето „Владислав Рибникар“ имало пукање.
Во соопштението наведуваат дека полицијата ги упатила сите расположливи патроли кон местото на настанот и го уапсила осомничениот малолетник, ученик во седмо одделение, кој, како што се сомнева, од пиштолот на татко му истрелал повеќе куршуми во правец на ученици и обезбедувањето на ова школо.
(Фото: „Данас“)
