Израелскиот претседател Исак Херцог ја повика вчера владата да ја запре контроверзната реформа во правосуството, еден ден откако премиерот Бенјамин Нетанјаху го смени својот министер за одбрана затоа што се спротивстави на потегот, што предизвика масовни улични протести.
„За доброто на единството на народот на Израел, заради одговорноста, ве повикувам веднаш да го прекинете законодавниот процес“, порача Херцог на Твитер.
Апелот на Херцог дојде откако десетици илјади демонстранти излегоа на улиците на израелските градови, во уште една драматична и немирна ноќ какви што, од почетокот на новата влада на Нетанјаху, имаше повеќе.
Нетанјаху вчера го отпушти својот министер за одбрана, Јоав Галант, еден ден откако тој повика на едномесечна пауза во процесот на контроверзната судска реформа што владата сака да ја спроведе.
„Премиерот Бенјамин Нетанјаху одлучи да го разреши министерот за одбрана Јоав Галант“, кратко вчера соопштија од кабинетот на премиерот.
Галант, член на истата десничарска партија Ликуд како и Нетанјаху, во својот говор во саботата вечерта рече дека евентуалното продолжение на поделеност околу ова прашање ќе биде „вистинска закана за израелската безбедност“.
Протести се одржуваат секоја недела откако во јануари годинава владата на Бенјамин Нетанјаху, една од најдесните во историјата на Израел, предложи план за реформа кој ја подели земјата. Реформата треба да го зголеми влијанието на пратениците врз судовите.
Нејзините критичари истакнуваат дека тоа ги загрозува демократските принципи на израелската држава.
Нетанјаху и неговите сојузници, крајно десните и ултраортодоксни партии, оценуваат дека планираната реформа е неопходна за да се воспостави рамнотежата на силите меѓу пратениците и Врховниот суд, кој тие го сметаат за политизиран.
(Фото: АФП / Ахмад Гарабли)
