Група високи офицери на војската на Габон се појавија на националната телевизија раноутринава и соопштија дека ја презеле власта откако државната изборна комисија објави дека претседателот Али Бонго освоил трет мандат.
Офицерите на телевизискиот канал „Габон 24“ изјавија дека ги претставуваат сите безбедносни и одбранбени сили во централноафриканската држава.
Додадоа и дека резултатите од изборите се поништени, дека сите граници ќе бидат затворени до понатамошно известување и дека институциите ќе се распуштат.
Новинар на Ројтерс информираше дека во главниот град Либревил, по телевизиското обраќање на војската, се слушаат силни пукотници.
Владата на земјата-членка на ОПЕК (Организација на земјите извознички на нафта) веднаш не го коментираше настанот.
„Во име на габонскиот народ, решивме да го зачуваме мирот со ставање крај на сегашниот режим“, порачаа офицерите.
Додека еден офицер ја читаше заедничката изјава, десетина други во воени униформи и со беретки на главите тивко стоеја околу него. Војниците се претставија како членови на Одборот за транзиција и обнова на институциите.
Во државните институции што ги прогласија за распуштени ги вклучуваат владата, сенатот, народното собрание, уставниот суд и изборната комисија.
Превратот, доколку биде успешен, ќе биде осми државен удар во Западна и Централна Африка од 2020 година. Пресвртите во Мали, Гвинеја, Буркина Фасо, Чад и Нигер ги поткопаа демократските процеси во изминатите неколку години.
Војската минатиот месец ја презеде власта во Нигер, дестабилизирајќи го регионот Сахел и ги вовлече светските сили во ситуацијата, чии стратешки интереси се загрозени.
Тензиите беа високи во Габон поради стравувањата од немири по општите избори во саботата, на кои Бонго се обиде да го продолжи 56-годишното владеење на неговото семејство, додека опозицијата притискаше за промени во државата богата со нафта и какао, но во која владее сиромаштија.
Недостигот на меѓународни набљудувачи, суспензијата на некои странски медиуми и одлуката на владата да го блокира пристапот до Интернет и да воведе полициски час по изборите, ја зголеми загриженоста за транспарентноста на изборниот процес.
Шеесет и четиригодишниот Бонго, кој го наследи својот татко Омар како претседател во 2019 година, се кандидираше за нов мандат против 18 предизвикувачи, од кои шест го поддржаа заедничкиот кандидат, поранешниот министер и универзитетски професор Алберт Онда Оса.
Од седиштето на Бонг ги отфрлаат тврдењата за изборна измама.
Зградата на парламентот беше запалена во 2016 година кога избија насилни улични протести против контроверзниот реизбор на Бонго за втор претседателски мандат. Владата потоа го оневозможи пристапот до Интернет неколку дена.
