Најважните европски берзански индекси денеска предпладне беа во благ плус, со што го продолжија позитивниот тренд после силниот минатонеделен раст, а според добивката се истакна акцијата на „Рајанер“ (Ryanair) откако таа авиокомпанија извести за рекордна добивка.
Паневропскиот индекс Стохх 600 (Stoxx 600) околу 9.30 часот беше со добивка од 0,21 отсто, откако минатата недела скокна за повеќе од три отсто, бидејќи инвеститорите беа израдувани од добрата заработка на компаниите и надежта за крај на циклусот на заострување на каматните стапки од водечките централни банки.
Истовремено, франкфуртски ДАКС (DAX) зајакна за 0,11 отсто, на 15.205 поени, лондонскиот Фтсе (Ftse) индекс за 0,12 отсто, на 7.426 поени, а париски ЦАЦ (CAC) за 0,15 отсто, на 7.057 поени.
Според растот на цените, предничеа акциите на патничките компании, со просечен раст од 1,3 отсто.
За тоа придонесе скокот на цената на акцијата на ирската авиокомпанија „Рајанер“ за 5,8 отсто, на највисоко ниво во последните триесет денови.
Имено, таа најголема европска авиокомпанија, мерена според бројот на превезени патници, денеска извести дека во првите шест месеци од својата фискална година остварила добивка во висина од 2,18 милијарди евра, 59 отсто повеќе од лани, и дека очекува оваа година рекорден профит, меѓу 1,85 до 2,05 милијарди евра.
Дополнително, објави дека за прв пат во својата историја планира да исплати дивиденда од 400 милиони евра во две транши, 200 милиони во февруари следната година и 200 милиони во септември.
Значително се зголеми и цената на акцијата на „Телеком Италија“, за 2 отсто, по информацијата дека е одобрена продажбата на неговата фиксна мрежа на американската приватна компанија „ККР“ за 19 милијарди евра.
На токиската берза Никеи индексот денеска порасна за 2,37 отсто, на 32.708 поени.
