Археолози на археолошкиот локалитет Сакари, јужно од Каиро, открија 150 бронзени статуи изработени по примерот на фараоснките богови и 250 добро сочувани египетски саркофази и други предмети од 5 век п.н.е., соопшти Министерството за туризам и антиквитети на Египет.
Меѓу откритијата во некрополата Сакари се статуи на египетските богови и божици Анубис, Амон, Мина, Озирис, Изида, Нефертем, древната божица на мачки Бастет и божицата на љубовта Хатор, како и статуа на кралскиот архитект Имхотеп кој ја изградил пирамидата Сакара, информираа од министерството.
Археолозите пронајдоа и музички инструмент систрум и збирка бронзени садови користени во ритуалите на божицата Изида. Обоени дрвени саркофази се пронајдени недопрени, а во нив се откриени мумии, амајлии и дрвени кутии.
Пронајдени се и дрвени статуи на божиците Нефтида и Изида од ран период, обете со позлатени лица, како и колекција од древни козметички кутии и садови, бронзено огледало, ѓердани, нараквици и украси што се ставале на нозете, над стапалата. Во еден саркофаг имало добро сочуван папирус напишан со хиероглифи, можеби стихови од Книгата на мртвите. Тој е испратен на анализа во лабораторијата на Египетските музеи во Каиро.
Саркофазите ќе бидат изложени во Големиот египетски музеј, кој е во изградба, сместен недалеку од Големите пирамиди во Гиза и треба да биде отворен до крајот на годината. Некрополата Сакара, јужно од пирамидите во Гиза, во последните години е неисцрпен извор на археолошки наоди. Мисијата на археолошки ископувања на тој простор трае од 2018 година.
(Фото: ЕПА)
