Најбараниот азиски крал на дрогата Це Чи Лоп (59) е екстрадиран во Австралија каде му се заканува доживотна казна затвор.
Це, познат како „Ел Чапо од Азија“, е обвинет дека водел мултимилијардерска трговија со дрога во неколку земји, од Јапонија до Нов Зеланд, пишува Би-Би-Си.
Се верува дека тој е на чело на организација која доминира на азискиот нелегален пазар на дрога, вреден 70 милијарди долари.
Нарко босот со канадско државјанство лани беше уапсен на холандски аеродром од Интерпол.
Австралиската полиција објави слики на вооружени полицајци кои со лисици го носат од авионот во аеродромот во Мелбурн.
Денеска, Це треба да се појави пред локалниот суд.
Криминалната група на азискискиот нарко-бос шверцувала огромни количества метамфетамин, хероин и кетамин во Австралија во пакувања за чај. Обвиненијата на Австралија против Це се однесуваат на криумчарења од 2012 до 2013 година кога во земјата бил „увезен“ метамфетамин во вредност од 4,4 милиони австралиски долари, што е износ од 2,98 милиони американски долари.
Полицијата во домот на Це во Мелбурн пронашла над четири милиони австралиски долари во готовина, 99 дизајнерски чанти и жолто „ламборџини“.
Австралиската полиција го лови повеќе од една деценија.
Се вели дека поголемиот дел од неговата дрога завршила во Сиднеј и Мелбурн.
Це е приведен на аеродромот „Шипхол“ во Амстердам, во јануари 2021 година, додека се обидувал да се качи на авион.
Це ги негира обвиненијата за дрога. Тврди дека неговото апсење го наместиле австралиските власти и дека австралиската полиција незаконски организирала негово протерување од Тајван во Канада, вклучувајќи застанување во Холандија, за да може таму да биде уапсен.
Во апсењето на Це биле вклучени повеќе од 20 агенции. Се вели дека Це последниве години живеел во Хонг Конг, Макао и Тајван. Во затвор поминал девет години откако во 90-тите беше уапсен заради трговија со дрога во САД.
