Повторно стана тензично на релација Виена – Анкара, откако австрискиот канцелар Себастијан Курц најави дека Австрија нема да им дозволи на турските политичари да водат кампања на територијата на нивната земја.
Претседателот на Турција, Реџеп Таип Ердоган, ја осуди изјавата на Курц и рече дека мерките кои ги превзема Австрија можат лошо да им се одразат на земјата.
Ердоган им се закани на своите противници дека ќе платат „висока цена“ и нагласи дека борбата на Турција за демократија не смее да биде ограничена.
Од Виена, пак, му порачуваат дека неговите напади нема да го сменат ставот на австриската влада.
Владеачката коалиција меѓу Народната партија (ОВП) и Слободарската партија (ФПО) по однос на ова прашање покажаа големо единство, и му порачуваат на Ердоган дека нема да отстапат ниту милиметар од забраната.
„Турските предизборни настапи на политичарите од Анкара се несакани и нема да ги дозволиме“, порачуваат уште еднаш од австриската влада. Од таму се укажува дека потребната законска основа е воспоставена и се додава дека со години турското раководство се обидува турската заедница во Австрија и Германија да ја инструментализира.
„На таков начин конфликтите од Турција се внесуваат во ЕУ и ние тоа сакаме во иднина да го спречиме“, нагласуваат од австриската влада.
По повод забраната за предизборна кампања на турските политичари во Австрија шефот на турската дипломатија Мевлут Чавушоглу разговараше по телефон со австриската колешка Карин Кнајсел.
Кнајсел изразила разбирање за тоа дека во време на предизборна борба често се користи емоционална реторика, но повика на сензибилност за да не се загрозат билатералните односи меѓу двете држави.
