Вулканот Шивелуч на полуостровот Камчатка на далечниот исток на Русија еруптира рано утрово во 6.31 часот, исфрлајќи облак од пепел висок 10 километри, што претставува зголемена закана за воздушниот сообраќај, соопшти Тимот за одговор на вулканска ерупција на Камчатка (КВЕРТ).
Тимот издаде црвен аларм истакнувајќи дека „голем облак од пепел“ патува западно од вулканот и дека во секое време може да се случи експлозија и исфрлување на пепел до 15 километри височина.
„Тековната активност може да влијае на меѓународните летови и авионите што летаат на пониски височини“, се вели во извештајот.
Локалните власти ги затворија училиштата и им наредија на жителите на околните села да останат дома бидејќи облакот од пепел може да се прошири на десетици километри околу вулканот, рече лидерот на Уст-Камчатски, Олег Бондаренко во објава на Телеграм.
Еден од најголемите и најактивните вулкани во Камчатка, Шивелуч, имал околу 60 значајни ерупции во последните 10.000 години, а последната поголема се случила во 2007 година.
(Фото: Твитер)
