„Европската унија јавно ја отфрли глобалната кампања за снабдување со вакцини од Русија за Ковид-19, како пропагандна од непожелен режим, но зад сцената, Унијата се врти кон руската вакцина Спутник V, додека се обидува да ги врати своите обиди за да ги вакцинира своите 450 милиони луѓе“, јави Ројтерс, повикувајќи се на дипломатски извори во Брисел, пренесува РТВ.
Официјален претставник на ЕУ кој преговара со производителите на вакцини во име на блокот изјавил дека европските влади размислуваат да почнат разговори со производителите на Спутник V и ќе бидат потребни барања од четири европски држави, членки на Унијата, за да се почне процесот.
Унгарија и Словачка веќе ги купија руските вакцини, Чешка е заинтересирана, а официјалниот претставник на ЕУ рече дека Италија размислува да го користи најголемиот биореактор за производство на вакцини во земјата во фабриката во Реи Тера, близу Рим, за Спутник V.
Брисел е критикуван поради бавната вакцинација во рамки на Унијата, во време кога поранешната членка Велика Британија ги ублажува ограничувањата, болниците во регионот на Париз се блиску до преоптоварување, а Германија предупреди на трет бран, пишуваат западни медиуми.
Унијата потпиша договори со шест западни производители на вакцини и започна разговори со уште двајца. Досега одобри четири вакцини, но производствените грешки ја забавија кампањата за вакцинација и некои земји-членки бараат свои решенија.
