„Верувам дека граѓаните на 12 април мудро ќе донесат одлука со која ќе го трасираат патот по којшто ние политичарите, кои ќе добиеме поддршка, ќе ја водиме нашата држава“, изјави премиерот Зоран Заев по средбата кај претседателот Стево Пендаровски.
Тој рече дека датумот е постигнат со консензус и оти е земено предвид ратификувањето на Протоколот за членство во НАТО.
Одговарајќи на новинарски прашања, Заев рече дека по пат на внатрешни консултации во СДСМ ќе биде избран техничкиот премиер, кој ќе ја извршува функцијата од 3 јануари.
Заев смета дека сега е добар момент да се разговара и за промена на изборниот модел, а според СДСМ, како што посочи, е прифатливо да има една изборна единица и отворени листи.
„Овој датум ни определува можност да разговараме за изборниот модел. Како претседател на најголемата политичка партија останувам на ставот дека државата треба да прави исчекор кон демократизација на процесот. За СДСМ е прифатливо една изборна единица и отворени листи. Сакам да ги слушам помалите политички партии затоа што многу често поголемите партии се собираме и не е чесно само ние да одлучуваме. Имав состанок со нив и тие се за една изборна единица. Верувам дека државата ќе смогне сили да направи исчекор кон поголема демократизација преку избирачкиот процес, односно Изборниот модел за да го зајакнеме плурализмот во државата преку Парламентот, рече Заев.
Во однос на пописот, кој треба да се одржи следната година, премиерот истакна дека неговиот став е тој да се спроведе следната година по изборите, но доколку Државниот завод за статистика е подготвен, тогаш да се спроведе и пред изборите.
„Важно е ден поскоро да го имаме пописот“, посочи Заев.
