Република Турција е еден од нашите најголеми пријатели и нивните очекувања се кога ќе завршат сите политички изборни процеси, тие ќе ја отпочнат процедурата за ратификација н протоколот за членство на нашата земја во НАТО, одговори премиерот Зоран Заев на новинарско прашање кога се очекува Анкара да го
ратификува протоколот.
Заев на прес-конференцијата по завршувањето на состанокот на Северноатлантскиот совет на НАТО, за ратификацијата од страна на Турција, се повика и на изјавата на потпретседателот на турската Влада дека тие продолжуваат со поддршка на нашата земја и во најкус можен рок ќе го ратификуваат овој протокол.
„Нашите министерства за внатрешни работи, за правда, соработуваат и за другите отворени прашања, таа соработка продолжува согласно сите меѓународни стандарди, кажа Заев уште еднаш истакнувајќи дека Турција е еден од нашите најголеми пријатели, изразувајќи уверување оти тоа ќе го докаже и овој пат.
Генералниот секретар Столтенберг одговарајќи на прашање за присуството на НАТО во Косово појасни дека таму се присутни преку Мисијата КФОР со задача да креираат мир и безбедност и да ги заштитат сите заедници вклучувајќи ги и Србите.
Нагласи дека имаат блиска соработка со сите заедници што живеат на Косово.Тоа ни е задачата, потенцира, тоа ни е мисијата во Косово.
Според него, има потреба и од политичко решение и затоа го поддржуваат дијалогот меѓу Приштина и Белград затоа што на долг рок тоа е единствениот начин да се решат разликите кои постојат.
Во тој контекст, нагласи Столтенберг, она што го договорија премиерот Заев и грчкиот премиер Ципрас е модел и за Косово и за целиот регион затоа што покажува дека е возможно да се надминат историските разлики и несогласувања.
„Да не се заборави минатото, но притоа да не се уништува иднината.
Преспанскиот договор и напредокот што го направи Северна Македонија со Договорот со Грција е важен за земјата, но исто така е голема инспирација да биде модел за целиот регион да ги надминат разликите и да се придвижат кон иднината заедно, истакна на прес-конференцијата генералниот секретар на НАТО Столтенберг.
